အိပ်ဆေးမရှိ

အလုပ်ထဲမှာ အအိပ် ပျက်တဲ့သူတွေ များနေတာနဲ့ ဒီအကြောင်း ရေးဖြစ်တာပါ။ တချို့က ကလေးငယ်လို့၊ တချို့က စိတ်ပူလို့၊ တချို့ကျတော့လည်း အစာမကြေလို့ အကြောင်းမျိုးစုံပဲ။ အားလုံးထဲကမှ အန်ဂျီ ဆိုတဲ့ အမျိုးသမီးကတော့ အိပ်မရတာ အနှစ် ၂၀ ရှိပြီတဲ့။ သူ့ယောကျာ်းက ဆရာဝန်ပါ။ လက်ထပ်ပြီး အတော်ကြာတဲ့ အထိ ကလေး မရခဲ့ဘူး။ ရပြန်တော့လည်း ၂ယောက် ဆက်တိုက်။ ကလေး ၂ယောက် မွေးပြီး ကတည်းက ညဘက် အိပ် မရတော့တာပါ။ အစကတော့ သာမန် အိပ်မရတာပဲ ဆိုပြီး ဘယ်သူမှ သူ့ကို အရေးထားပြီး နားမထောင်ကြဘူး။ ၂နှစ် အတွင်းမှာ ပိန်သွားလိုက်တာ ဆိုဒ် ၁၆ ကနေ အခုဆို ၁၀ ဖြစ်နေပြီ။

ခရစ်စမတ်နဲ့ သူ့မွေးနေ့တွေမှာ ရတဲ့ လက်ဆောင်တွေက အိပ်ပျော်စေမယ့် အရာမျိုးတွေ။ အားလုံးကလည်း သူအိပ်မပျော်တာ သိနေတော့ စာအုပ်၊ လာဗင်းဒါ ခေါင်းအုံး၊ သီချင်းခွေ၊ တရားခွေ၊ ချယ်ရီ ဘရန်ဒီ စတာတွေ ပေးကြတယ်။ ဒါ ကိုယ် မြင်ရသလောက် ပြောတာ။ တခြား သူ့ သူငယ်ချင်းတွေ ကလည်း အိပ်ပျော်စေမယ့် လက်ဆောင်တွေ ပေးကြတယ် ပြောတယ်။ သွေးစစ်၊ ဆီးစစ် အပြင် တခြား မတဲ့နိုင်တဲ့ အစားအသောက် စစ်ဆေးရေးတွေလည်း အားလုံး လုပ်ပြီးပြီ။ သူ့မှာ ငွေကြေး အတွက်ရော မိသားစု အတွက်ပါ ပူပန်စရာ မရှိသလောက် အဆင်ပြေတယ်လို့ ပြောလို့ရပါတယ်။ အန်ဂျီ အိပ်မပျော်ရခြင်း အကြောင်းက ဘာလဲ ဆိုတာ ဘယ်သူမှ မသိကြဘူး။

နောက်တယောက်ကတော့ ဆရာမ ပါ။ သူကလည်း ညညဆို အိပ်မပျော်လို့ အိပ်ဆေး သောက် အိပ်ရတယ်တဲ့။ မနက်ရောက်တော့ အိပ်ရာထချင်စိတ် မရှိလို့ စိတ်ကြွဆေး လိုမျိုး သောက်ပြီး ရုံးကို ထွက်လာရတယ်တဲ့။ ညအိပ်ချိန်က နာရီ အနည်းငယ်ပဲရှိလို့ စိတ်မကြည်မလင်လည်း ဖြစ်တတ်ပါသေးတယ်။ ပျော်စရာ သတင်းကြားရင် စိတ်လှုပ်ရှားပြီး အိပ်မရသလို စိတ်ညစ်စရာ ရှိရင်လည်း အိပ်မရတော့ဘူး ဆိုပဲ။ သူတို့ချင်း စကားပြောဖြစ်ကြရင် ဘယ်သူက အိပ်ပျော်လဲ ဘယ်လို အိပ်ပျော်အောင် လုပ်မလဲ စတာတွေပဲ ကြားရတယ်။

အသိဆရာဝန် တယောက်ကတော့ အလုပ် ပင်ပန်းလွန်းလို့ အိပ်ဆေး အမြဲ သောက်ရတယ်။ နောက်တနေ့ အလုပ်လုပ်ရမှာမို့ မအိပ်ရင် မဖြစ်တာကြောင့် အိပ်ဆေး သောက်ရတာတဲ့။ သူတို့ကို ကြည့်ပြီး စိတ်မသက်သာဘူး။ တတ်သလောက် မှတ်သလောက်လည်း အကြံပေးကြည့်ပါတယ်။ သူတို့က သမ္ဘာရင့်နေပြီ ဆိုတော့ ကိုယ်ပြောတာတွေက လုပ်ပြီးနေသားတွေ။ အိပ်ချင်တိုင်း အိပ်လို့ရတဲ့ သူတွေ အတွက်တော့ အိပ်မပျော်ဘူး ဆိုတာ မယုံနိုင်စရာပါပဲ။ ဒါပေမယ့်လည်း သူတို့ ကိုယ်ခန္ဓာတွေကိုပါ ထိခိုက်နေတာ တွေ့နေရတာ ဆိုတော့ တကယ် ဖြစ်ပျက် ခံစားနေရတာ။ အိပ်မပျော်တဲ့သူများ အိပ်ချင်တဲ့ အချိန်မှာ အိပ်ပျော်နိုင်ကြပါစေနော်။