တနိုင်

ထီပေါက်ရင် ...
ပိုက်ဆံရှိရင်...
အခြေကျရင်...

လုပ်ချင်တာတွေ စာရင်း တို့ထားတာ တပုံကြီး။ အလုပ် ရပြီး ၄နှစ်အကြာ အဖွားနဲ့ အမေ ရှေ့ဆင့် နောက်ဆင့် ဆုံးသွားလို့ စိတ်ထဲ ရှိသလောက် မပြုစု လိုက်ရဘူး။ အခုတော့ စပျစ်သီး စားလျှင် အစေ့မပါတဲ့ စပျစ်သီးကို တမ်းတမ်းတတ မှာစားတတ်တဲ့ အဖွားကို သတိရတယ်။ ချောကလက်တို့ ဒိန်ခဲတို့ ကြိုက်တတ်တဲ့ အမေ့ကို စားချင် သလောက် စားပါလို့ ၀ယ်ကျွေးဖို့ အမေက လောကကြီးထဲ မရှိတော့ဘူး။ မစောင့်ခဲ့လျှင် ကောင်းသား ဆိုပြီး နောင်တ ရစရာတွေလည်း တပုံကြီး။ အနာဂတ်ကို ကြို မမြင်နိုင်တော့လည်း ဖြစ်တတ်ပါတယ် လို့ တွေးလျှင် ရပေမယ့် မိဘဆွေမျိုးနဲ့ ပတ်သက်တဲ့ ကိစ္စတွေကျတော့ ဖြေဖို့ မလွယ်ပါဘူး။ ဒါကြောင့် သူငယ်ချင်းတွေကို အမြဲ တိုက်တွန်း ဖြစ်တာက မိဘ အတွက်ဆို ပိုက်ဆံ ရှိတဲ့ အချိန်ထိ အခြေကျတဲ့ အချိန်ထိ မစောင့်ပါနဲ့၊ တတ်နိုင်တာကို လုပ်ပေးလိုက်ပါ လို့။ နားလည် လက်ခံတဲ့ သူရှိသလို တချို့ ကျတော့လည်း ဒီအရွယ် ရောက်တဲ့ အထိ မိဘဆီက ယူလို့ကောင်းတုန်း။

ကိုယ်တွေ့ ကတော့ လူကြီး မိဘတွေ အတွက် တခုခု ၀ယ်မယ် ဆိုလျှင် အမြဲ သက်သက်သာသာနဲ့ ရတယ်။ အဒေါ်တွေက ပေါင်ဒါ ၀ယ်ပေးပါဦး ဆိုလို့ သွားဝယ်တာ တ၀က်ဈေးနဲ့ ရလာတယ်။ မျက်နှာသုတ်တဲ့ စက္ကူလေးတွေ ၀ယ်ပေးဖို့ သွားတာ တခုဝယ် တခု အလကား ရလာတယ်။ တိုက်ဆိုင်တာလို့ ပြောလျှင် ရပေမယ့် တခါလည်း မကမို့ သတိ ထားမိလာတာ။ သူတို့ မေတ္တာကြောင့် ကိုယ်လည်း အကျိုး ခံစားရတာ နေမှာ။

မနေ့က အလုပ်ထဲမှာ ၁၉နှစ်အောက် ကလေး၂ယောက် ကိုယ့်ကို လာရှာတယ်။ လုံခြုံရေး စာမေးပွဲ ဖြေချင်လို့တဲ့။ ဟယ် ငါနဲ့ ဘာဆိုင်လို့လဲ ဆိုတော့ အွန်လိုင်း ကနေ ဘွတ်ကင် တင်ပေးပါတဲ့။ အင်တာနက် ရှိလျှင် ဘယ်သူမဆို လုပ်လို့ ရတယ် လို့ပြောတော့ သူတို့မှာ အကြွေးကဒ် မရှိဘူး ဆိုပြီး ပိုက်ဆံ ထုတ်ပေးတယ်။ ဒီကလေးတွေကို လွှတ်လိုက်တဲ့ လူတွေရော အလုပ်ထဲက လူတွေကပါ သူတို့ ကဒ်နဲ့ မသုံးချင်လို့ ကိုယ့်ဆီ လွှဲလိုက်တာ။ ဒါနဲ့ပဲ စာမေးပွဲ ဖြေချင်တဲ့ လူတွေ ကိုယ့်ဆီ ရောက်ရောက်လာတယ်။ ပိုက်ဆံ မရဘဲ ကိုယ့် အလုပ်နဲ့လည်း မဆိုင်ဘဲ ဒီလူတွေအတွက် အချိန် ပေးရတာ၊ ဖုန်းဆက်ပြီး အကြောင်းကြားပေး ရတာတွေ ရှိသေးတယ်။ လူနည်းစု တစုအတွက် ကိုယ်တတ်နိုင်တာ လုပ်ပေးတာ။

ဒီနေ့လည်း တယောက်ပြီး တယောက် CV ရေးပေးဖို့ လျှောက်လွှာ ဖြည့်ပေးဖို့ စာရေးပေးဖို့ အကူအညီ လာတောင်းကြတယ်။ တယောက်ကို တနာရီလောက် အချိန် ပေးရတယ်၊ ကွန်ပြူတာ မသုံးတတ်သူ၊ အလုပ် ရာဇ၀င်ကို မမှတ်မိတဲ့သူ၊ စာ မရေးတတ်သူနဲ့ ကြုံလျှင် အချိန် ပိုကြာသေးတယ်။ အစကတော့ အလုပ်ရှားတဲ့ အချိန်မှာ အလုပ် ရှာနေတဲ့သူတွေမို့ ကိုယ်ချင်းစာပြီး ကူညီလိုက်တာ။ ဘယ်သူက သတင်း ဖြန့်လိုက်တယ် မသိဘူး လူကိုယ်တိုင်ရော ဖုန်းနဲ့ပါ လာကြလို့ တယောက်ချင်း ကူညီတာကို ရပ်ပြီး အဖွဲ့လိုက် သင်တန်းပဲ လုပ်တော့မယ် လို့ ပြောမိတယ်။ သေချာ ပြန်စဉ်းစား လိုက်တော့ သူများ တကယ် လိုနေတဲ့ အချိန်မှာ တတ်နိုင်တာ လုပ်ပေးသင့်တယ်လို့ ထင်ပါတယ်။

ထီပေါက်လျှင် ကိုယ်နဲ့ နီးစပ်တဲ့ လူမှုရေး အဖွဲ့အစည်းတွေကို အများကြီး လှူမယ်လို့ စိတ်ကူးရှိတယ်။ လခ အများကြီး ရလျှင် ပုံပါတဲ့ ရောင်စုံ အဘိဓါန် စာအုပ်တွေ အများကြီး ၀ယ်လှူမယ်လို့ စိတ်ကူးရှိတယ်။ အခြေကျလျှင် လူကြီး မိဘတွေ ကို ခေါ်ပြီး ကျွေးမွေး ပြုစုမယ် လို့ စိတ်ကူးရှိတယ်။ တခုမှ မဖြစ်သေးဘူး။ မရေရာတဲ့ အရာတွေ ဖြစ်လာမလားလို့ စောင့်နေတာနဲ့ တနိုင် ကူညီမှု ပေးဖို့တွေကို မျက်နှာလွှဲမိတော့မလို့။